Пасля двухдзённага рэйду сілавікоў у мінскі офіс вядомай архітэктурнай студыі ZROBIM architects кампанія, відаць, аднавіла працу. Большасць затрыманых супрацоўнікаў, паводле інфармацыі «Люстэрка», ужо на свабодзе. Таксама стала вядома, што менавіта цікавіла сілавікоў.
Нагадаем, раніцай 9 красавіка ў мінскі офіс ZROBIM architects прыйшлі сілавікі. Як паведамлялі «Люстэрку» дзве не звязаныя паміж сабой крыніцы, былі затрыманыя ўсе супрацоўнікі — каля 50 чалавек, якія знаходзіліся на месцы. Сярод іх быў і сузаснавальнік кампаніі Андрэй Макоўскі (Андрусь Bezdar). На наступны дзень, 10 красавіка, затрыманні працягнуліся — на працоўныя месцы выклікалі ўсіх, каго не было ў офісе напярэдадні. Як расказала «Люстэрку» крыніца, следчыя дзеянні праводзіў Дэпартамент фінансавых расследаванняў Камітэта дзяржкантролю.
Блізкі да сілавікоў тэлеграм-канал тады заявіў, што цікавасць да кампаніі ўзнікла праз пост Макоўскага ў сацсетцы Threads, дзе ён расказаў пра патрабаванне дзяржорганаў наняць у штат ідэолага.
Аднак, паводле інфармацыі крыніцы «Люстэрка», ідэалагічныя пытанні сілавікоў цікавілі мала.
— Затрыманых супрацоўнікаў пыталі пра шэрыя схемы падаткаабкладання, то-бок шукалі ўхіленне ад выплаты падаткаў. Па тэме 2020 года прайшліся хутчэй па датычнай, — расказаў суразмоўца.
Ён таксама паведаміў, што практычна ўсіх, каго затрымлівалі 9 і 10 красавіка, ужо адпусцілі. Колькі чалавек застаецца за кратамі і хто менавіта, крыніцы невядома.
Тым часам офіс студыі, відаць, вярнуўся да працы. 16 красавіка журналіст «Люстэрка» пад выглядам кліента патэлефанаваў у ZROBIM architects. Супрацоўніца, якая адказала на званок, пацвердзіла, што кампанія працуе.
Акрамя таго, 14 красавіка на старонцы студыі ў Instagram з’явілася відэа з удзелам сузаснавальніка Андрэя Макоўскага, пра затрыманне якога паведамлялася раней. Але гэта не можа сведчыць, што мужчына на волі. Апублікаванае відэа — фрагмент вялікага роліка пра архітэктуру Мінска, які выйшаў на YouTube-канале студыі яшчэ 12 лютага.
Чытайце таксама
Поблагодарить за статью